រាជធានីភ្នំពេញ, ថ្ងៃទី៦ ខែសីហា ឆ្នាំ២០២៦

ឯកឧត្តមបណ្ឌិត ចន ណារិទ្ធ រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានអនុគណៈកម្មាធិការទទួលបន្ទុកបរិវត្តកម្មឌីជីថលក្នុងប្រព័ន្ធគាំពារសង្គម (អ.ប.ប.) បានអញ្ជើញដឹកនាំកិច្ចប្រជុំអនុគណៈកម្មាធិការទទួលបន្ទុកបរិវត្តកម្មឌីជីថលក្នុងប្រព័ន្ធគាំពារសង្គម លើកទី៤ ដើម្បីពិនិត្យ និងតាមដានវឌ្ឍនភាពនៃការអនុវត្តផែនការសកម្មភាព ឆ្នាំ២០២៦ ក្នុងឆមាសទី១ និងកំណត់ទិសដៅអនុវត្តបន្ត សម្រាប់ឆមាសទី២ ឆ្នាំ២០២៦។ កិច្ចប្រជុំនេះ មានការអញ្ជើញចូលរួមពី ឯកឧត្តម លោកជំទាវ លោក លោកស្រី ដែលជាអនុប្រធាន និងសមាជិកនៃអនុគណៈកម្មាធិការ ព្រមទាំងថ្នាក់ដឹកនាំ និងមន្ត្រីនៃលេខាធិការដ្ឋាន អ.ប.ប. នៃអគ្គលេខាធិការដ្ឋានក្រុមប្រឹក្សាជាតិគាំពារសង្គម។

បន្ថែមលើនេះ អង្គប្រជុំក៏បានពិនិត្យវឌ្ឍនភាពសំខាន់ៗក្នុងរយៈពេល ៦ ខែចុងក្រោយ នៃការដាក់ឱ្យអនុវត្ត និងពង្រីកវិសាលភាពថ្នាលឌីជីថលគាំពារសង្គមកម្ពុជា (DSPP) ព្រមទាំងវឌ្ឍនភាពនៃការធ្វើអន្តរប្រតិបត្តិការរវាងមូលដ្ឋានទិន្នន័យចុះបញ្ជីគាំពារសង្គម (SPR) ជាមួយនឹងប្រព័ន្ធឌីជីថលរបស់ក្រសួង ស្ថាប័នពាក់ព័ន្ធ ផងដែរ។